2Jo | TTE | STEP |

2 Yoni Leta labuina Yoni ilele

Walo bagubagunana

Leta bwaite kana tolelelele esana nige iwawalo-masalan na iwalomo, “Yau tobaguna yabo tapwalolo koina.” Na tomo sibaibaiwa siya Buki kana tolivasi ali walo bwaimwana leta tolelena bwaite iya Yoni Sebedi natuna. Tabe besiele nige iwawalo-masalan yaiya letane iyawasa koina, na iwalomo “Yayawasayawa koliwo, kowa sine gitegite-sipwaina Yaubada koina mekamkavao natumwao.” Nuwana sine yawasosi menatunao, na sibaibaiwa Buki Tabu kana tolivasi siwalo nuwana makamakayaumo walona tapwalolo yabo kaiwena bwaine Yoni iwalowen yakato sine na natunaone siya totapwalolo bodaliyao. Yoni leta bwaite ilele yo iyawasa kolili na mesabana iedeedede na ikabiyakaiweli na me ali mulolo simiyamiya yo besiele sibomayoi sigitekalatagili toyakayakatai mwakomwakotali kolili. Yoni ana leta bwaite kalona mena iedeedede mulolo yo yakayakatai dudulaili kaiweli.

2 John

1 Yau ami tobaguna yabo, na komiu ekalesiya kolimiu leta bwaite yaleleyawa. Ami miyagogo besiele Yaubada sine igitesipwai yo komiu kaigeda kaigeda besiele sinene natunao. Walo yawasosi, yamulolo lalakina kolimiu. Besiele tabe siya kamwasa yawasosi kana tomuliyayao simulolo kolimiu. 2 Kamulolo kolimiu kaiwena wasa dudulaina katela mena imiyamiya kani imiyayai. 3 Tamala Yaubada yo Natuna Yeisu Keliso ali mulolo yo ali katekamkamna kolili tamiya-daumwali, me ala walo yawasosi, yo me ala mulolo yawasosi kaigeda kaigeda koina.

Keliso wasana wakabi-kalatan

4 Tauna kona tupwaliyao ekalesiyao ami boda luwali mena yalobaili kamwasa dudulaina koina simulimuliye, kala loina besiele Tamala koina, kaiwena yayaliyaya lalakina. 5 Na yakawanoi kolimiu ekalesiyao kwaemulomulolo-wagimiu. Loina bwaite kaiwena yaedeedede nige loina waluwaluna, na loinane siyeyama kolila kaba yatubu koina saugana tanuwabui yo tameli. 6 Mulolo bwaimwana Yaubada ana loina taobigaili, besiele kala loina. Yo iloinayagila bwaimwa taemulomulolo-wagila besiele tabenalanako kaba yatubu koina.

Yakayakatai dudulaina takabikalatan

7 Letane bwaite yalele kolimiu kaiwena tomwakomwakota sibaibaiwa siyaele siyawatagiliko yanuwa yaulina mena sitakitakikili na yakato tomo siwoyaili siba, “Yeisu Keliso nige ilolobima bulibuli mena na iyamala tomo yanuwa yaulina mena.” Na tem tomo yaiya iwalo besiele, iya Keliso kana tokalomagigili. 8 Kwabomayoi wagite-kalatagimiu tomoliyaone kolili kisi ami paisowa uwena siyaboita. Na wakepate kaikaiwe ami paisowane maisana yawasosi kaiwena. 9 Na tem yaiya Keliso ana yakayakatai koina nige imiyamiya, na ilogabaen ilau yakayakatai uloina koina, Yaubada nige imiyamiya koina. Na tem yaiya imiyamiya Keliso ana yakayakatai koina, bwaimwa Tamala Yaubada yo tabe Natuna simiyamiya koina. 10 Tem tomo yabo ilaoma kolimiu na yakayakataine bwaite nige iyayakayakatai-yani kolimiu, tabu kisi kwayoganama ami nume mena. 11 Na tem yabo kowa kuyogan kowa kulaomako kana tosagu ana paisowa naenaena koina.

Nuwatu mwawamwawasina

12 Nuwatu sibaibaiwa nuwanuwagu yawalowegili bwaite letane koina na genuwagu pen yo pepa yayapaisowa. Na nuwanuwagu yalaowa yagitaimiu na tamiya-toyawa man kaigeda na taedeedede na mesabana komiu yo yau me ala yaliyaya. 13 Tomeliwo gitegitesipwaili ekalesiyao mekaukavao ali mulolo siyawasa kolimiu kaiwena ama nuwatu kita susu kaigeda.